Once．in a Life Time

April 19, school last day, 去咗睇首場《一期一會》。

對呢個劇係有期望的，畢竟正如我早前寫過，林一峰趙學而梁祖堯湯駿業楊詩敏林小寶，八個演員當中有六個已經係肯定好睇，咁嘅組合好難令人唔去期望...

20:00 開場，開場前導演宣佈趙學而因為綵排時受傷而未能參演，「美雪」的戲份今次惟有抽起... OMA... 美中不足...



故事，其實係一個好簡單，好 straight-forward 的內容。
冇咩伏線可言 (因為實在太明顯喇)，有時 QQ 地用咗 d 我覺得幾卡通的 expressions，好些地方甚至直向到令人毛管有點...
但，有趣的是，我可以接受... 感覺不算糟糕嘛。
劇場就係一個咁有趣的地方，「永未預計得到」的化學作用～

睇住台上呢五個人行來行去，似乎有點「甚麼都要管」的意味，但心底卻有一份不期然的嚮往... 當中的單純似乎已是不合時宜，但上一次你對別人如此推心置腹，把對方看得比自己更重要是何時？
這個年代，少再聽到為朋友兩脇插刀，但我相信，一些情，一些事，總會一直下去。
這五個人，胡鬧，無聊，爛 gag，但遇上問題，個個願意勇字當頭擋在前面；當然，冇人話過好朋友就唔可以反面鬧交－－人性，總有幾分莫名其妙的嫉妒惡毒，但最後，大家都選擇了完全的包容與原諒......

因為，大家都是彼此的一期一會。

正如浩一的V.O.，『未必每個問題都可以解決到，但有人喺身邊同自己一齊，唔係已經好好喇咩？

......
亮太，點解你仲要走呀？』



浩一的聲音，清晰的在偌大的歌劇院迴盪著。

100%紅色的亮太，用出走去逃避的問題。沉重得使他壓抑不了，擺脫不來的問題。

後來，浩一終於提起那一夜，『錯在太戇居！』

有個人，即使你每次都遲到，仍然會等你，然後柔聲說「你又遲到啦」；
有個人，想要帶你離開自衛的堡壘，領你到另一個天地；
有個人，早已在車廂內與你無數次擦肩而過，對望良久，竟莫名其妙的約你到東京畢業旅行；
有個人，你知道，你的愛情，你的一生，在他手中......

只要你出現。

一切即將揭盅，屏息靜氣，竟怯得不敢靠近...
一刻遲疑，落得一生遺憾。
戇居。

但故事，還是落在原點最動人。
而且，我們已經見到，他往後的日子，都會有他的同在。
一點十五分，已經刻到他生命深處。
一份單純的篤定，
相遇一刻，繾綣一生。

亮太，就是所有人的一期一會吧。
不會再有更美麗的。



演員方面，歌唱得好，呢個唔多講喇，有睇過佢哋的一定知～
梁祖堯楊詩敏極度好睇，呢個戲ｄ感情上落好大，佢哋兩個超級正～！怎一個好字了得～
琉子姐由小寶飾演，當然冇失望啦～

尾聲，一峰喊住唱《當我想起你》，感覺好真實...

音樂呢，好鍾意《一期一會》的 music bridge，感覺良好～一種即將出發的興奮
(一峰係總監 wor！ Soundtrack 傾家盪產都要到手...)
另外都好鍾意佢 d visual，火車高速駛過，感覺被扯進一個不真實的空間，看一個真實的故事...
記得第一場嗎？漂亮的音樂，亮太教第一次遲到的浩一咬手錶，畫面只在亮太捉住浩一的手那一刻停住，然後跳入visual...
出發的感覺很強烈，這一刻，就像拍照般定格下來...


雖然今次呢個位置唔錯，但始終唔太睇得清楚 facial expressions...
即係話，有下次的話，我要睇 $400...

謝幕時學而出現，大伙兒圍住佢唱《偏偏喜歡你》，唱得好好聽～
而呢一刻，我見到浩一俊彥亮太健次直美由紀美雪加奈琉子，真的活了出來......




《一期一會》，遊走於真實空間中的邂逅。